لندن میں نوازشریف کی سیکیورٹی میں اضافہ کر دیا گیا

لندن میں نوازشریف کی سیکیورٹی میں اضافہ کر دیا گیا ہے، 4 مقامی باڈی گارڈ حسن نواز کے سٹین ہوپ ہاؤس پر واقع دفتر کے باہر دیکھے گئے ہیں، نوازشریف نے اسی دفتر سے گوجرانوالہ کی ریلی سے خطاب کیا تھا۔

گزشتہ روز یہ باڈی گارڈ تمام دن دفتر کے باہر موجود رہے، اسی طرح ایون فیلڈ میں شریف فیملی کی رہائش گاہ پر پرائیویٹ گارڈز دیکھے گئے ہیں۔

ڈان اخبار کے مطابق 2 گارڈز سونگھنے والے کتوں کے ساتھ ایون فیلڈ کے ساتھ سڑک پر موجود رہے۔

شریف فیملی کی رہائش گاہ اور دفتر کے باہر محافظوں کی اچانک موجودگی سے اندازہ ہوتا ہے کہ پاکستان تحریک انصاف کے حمایتیوں کی جانب سے احتجاج کے خطرے کے پیش نظر یہ اقدام کیا گیا ہے۔

گزشتہ روز پی ٹی آئی کے حمایتیوں نے شریف فیملی کی رہائش گاہ کے باہر مظاہرہ کیا تھا، ان کے ہاتھوں میں احتجاجی پوسٹرز تھے اور وہ نوازشریف کے خلاف نعرے لگا رہے تھے۔

اس موقع پر مسلم لیگ (ن) کے حمایتی بھی موقع پر پہنچ گئے اور انہوں نے جوابی نعرہ بازی شروع کر دی، لندن پولیس کو مداخلت کر کے کسی بھی قسم کے ممکنہ تصادم کو روکنا پڑا۔

یاد رہے کہ گزشتہ رات گوجرانوالہ میں پاکستان ڈیموکریٹک موومنٹ کے جلسے سے خطاب کے دوران نوازشریف نے اسٹیبلشمنٹ پر سخت تنقید کی تھی اور انہیں ملکی حالات کا ذمہ دار قرار دیا تھا۔

انہوں نے وزیراعظم عمران خان پر بھی ملکی حالات خراب کرنے اور معیشت بگاڑنے کا الزام عائد کیا تھا۔

ٹیگ

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Close

Adblock Detected

We are working hard for keeping this site online and only showing these promotions to get some earning. Please turn off adBlocker to continue visiting this site