جاپان کے ‘ٹوئٹر قاتل’ کو سزائے موت سنا دی گئی

جاپان میں ‘ٹوئٹر قاتل’ کے نام سے معروف30  سالہ تاکا ہیرو شیرایشی کو عدالت نے سزائے موت کا حکم سنا دیا ہے۔

تاکا ہیرو شیرایشی نے نو لوگوں کے ساتھ آن لائن دوستی کر کے انہیں قتل کرنے کا اعتراف کیا تھا۔

2017 میں تاکاھیرو شیرایشی کی جانب سے سماجی رابطے کی ویب سائیٹ ٹوئٹر پر ایسے لوگوں کو دوستی کی پیشکش کی جاتی تھی جنہیں خودکشی کے خیالات آتے رہتے تھے۔

مجرم کی جانب سے اعتراف کیا گیا تھا کہ تین مہینوں کے دوران اس نے 9 لوگوں کو پہلے گلا گھونٹ کر مارا اور پھر ان کے ٹکڑے ٹکڑے کر دیے تھے۔ قتل ہونے والے افراد میں سے 8 خواتین تھیں جن میں سے سب سے چھوٹی خاتون کی عمر 15 سال جبکہ سب سے بڑی کی 26 سال تھی۔

جاپانی نشری ادارے این ایچ کے کی جانب سے بتایا گیا کہ پبلک گیلری میں موجود 16 نشستوں کے لیے 435 لوگ اس کیس کا فیصلہ دیکھنے کے لیے آئے تھے۔ یہ ایک ایسا کیس تھا جس نے پورے ملک کو ذہنی صحت کے مسائل سے دوچار نوجوانوں کے لیے سماجی میڈیا کے خطرات سے آگاہ کیا تھا۔

2018 میں شیرایشی پر فرد جرم عائد ہونے سے پہلے 5 مہینوں تک اس کے نفسیاتی ٹیسٹ ہوتے رہے تھے۔ وہ ٹوئٹر کا استعمال کر کے ایسے لوگوں کی شناخت کرتا تھا جو کہ اس کے ساتھ خودکشی کی باتیں کرتے تھے۔ ان لوگوں کو میسج کرنے کے بعد وہ ان سے جان لیوا منصوبوں کو پایہ تکمیل تک پہنچانے کا وعدہ کرتا تھا۔

اس کی ٹوئٹر پروفائل پر درج تھا ‘میں ان لوگوں کی مدد کرنا چاہتا ہوں جو واقعی درد میں ہیں۔ مجھے کسی بھی وقت میسج کریں’۔

شیرایشی کے جرائم اکتوبر 2017 میں منظرعام پر آئے تھے جب پولیس افسران نے ایک 23 سالہ خاتون کی تلاش کے دوران اس کے اپارٹمنٹ میں رکھے کولرز اور ڈبوں میں سے انسانی اعضاء دریافت کیے تھے۔ بعد ازاں معلوم ہوا کہ لاپتہ خاتون بھی شیرایشی کا شکار بن چکی تھی۔

دفاعی وکلاء کی جانب سے عدالت کو درخواست کی گئی تھی کہ شیرایشی کو سزائے موت نہ سنائی جائے۔ ان کا کہنا تھا کہ میسیجز میں قتل ہونے والے افراد کی جانب سے شیرایشی کے جان لیوا منصوبوں کو منظور کیا گیا تھا۔ تاہم جج نائوکونی یانو کا کہنا تھا کہ شکار ہونے والوں میں سے کسی نے قتل ہونے کی رضامندی نہیں دکھائی۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button

Adblock Detected

We are working hard for keeping this site online and only showing these promotions to get some earning. Please turn off adBlocker to continue visiting this site