اسمبلیاں توڑنے کا نوٹیفکیشن دستخط کرکے رکھ لیا گیا ہے، رانا ثنا اللہ کا بڑا دعویٰ

اسلام آباد (مانیٹرنگ ڈیسک) مسلم لیگ (ن) پنجاب کے صدر رانا ثنا اللہ نے دعویٰ کیا ہے کہ حکومت نے اسمبلیاں توڑنے کا نوٹیفکیشن پہلے ہی دستخط کرکے رکھ لیا ہے۔ رانا ثنا اللہ نے لاہور میں میڈیا سے گفتگو کرتے ہوئے کہا کہ ملک کی سیاسی صورتحال میں سیاسی جماعتیں سیاسی جماعتوں سے رابطے میں ہیں، فون آنے اور اشارے آنے بند ہو گئے ہیں۔ انہوں نے کہا کہ میاں نواز شریف کا بیانیہ اور موقف کامیاب نظر آرہا ہے، نواز شریف کا بیانیہ تھا کہ سیاست سیاستدانوں کو کرنی چاہیے، ٹیلیفونز اور اشاروں سے سیاست نہیں ہوتی۔ ن لیگ پنجاب کے صدر کا کہنا ہے کہ متحدہ اپوزیشن کی جماعتوں نے بھی تجویز نواز شریف کے سامنے رکھ دی ہے، تحریک انصاف کے کئی لوگ بھی نواز شریف کے فیصلے کا انتظار کر رہے ہیں۔ رانا ثنا اللہ نے کہا کہ عدم اعتماد کی تحریک کی کامیابی کے بعد ملک کے وزیراعظم کا فیصلہ نواز شریف کرے گا اور پنجاب کے وزیراعلیٰ کا فیصلہ بھی نواز شریف کرے گا۔ انکا کہنا ہے کہ میاں نواز شریف کا بیانیہ آگے بڑھے گا، میں کسی کا نام نہیں لیتا لیکن ہر ادارے کو اپنا اپنا کام کرنا چاہیے، اگلے الیکشن میں ووٹ کو عزت ملے گی۔ ن لیگ پنجاب کے صدر نے کہا کہ وزیراعظم بھی نواز شریف کے فیصلے کا انتظار کر رہے ہیں، حکومت نے اسمبلیاں توڑنے کا نوٹیفکیشن پہلے ہی دستخط کرکے رکھ لیا ہے۔ رانا ثنا اللہ نے مزید کہا کہ مسلم لیگ ن نے اپنا ہوم ورک مکمل کر کے نواز شریف صاحب کو پیش کر دیا ہے، وزیراعظم اور وزیراعلیٰ کے فیصلے اللہ کے حکم سے نواز شریف کریں گے۔

جواب دیں

آپ کا ای میل ایڈریس شائع نہیں کیا جائے گا۔

Back to top button

Adblock Detected

We are working hard for keeping this site online and only showing these promotions to get some earning. Please turn off adBlocker to continue visiting this site